الجزء السادس و الآخير
ما أجمله !
سرحت و أنا بطلع عليه .. كيف بمشي و هو مبسوط ! سرحت لبعيد بعيييييد .. تزكرت المواقف اللي حاولت فيها ألفت انتباهه..تزكرت أشعاري و كتاباتي و الدفتر اللي اشتريتوا خصوصي إلو..تزكرت عيونو و لما كنت أتمنى أشوفهم بطلعوا علّي ! يا الله ما أحلى ابتسامته و هي طايرة بجنبه .. نيالها رح تشوف عينيه و تسمع كلامه الحلو كل يوم .. و نيالها بحبها !
و انتهت الأغنيه و أنا كأني بكوكب تاني .. كل اللي عم بشوفوا وجهه و ضحكته و مشيته بس هو .. و بدت أغنية :
"كل اللى من قبلك خلص راح ومضي
مثل الحلم لما فقت فجأة أنقضي
مابدى غيرك من الدني أبقى معه
أدعي لربي ان غاب لحظة .. ان غاب لحظة .. ان غاب لحظة يرجعه
حسيت حدك كيف بغفي ع الهدا
كيف الفرح طايرني ع أبعد مدا
حسيت ما بدى انا غيرك حدا
من لمستك غرق ورد .. غرق ورد .. غرق ورد خد الندا
اغمرنى حبيبى لقلبك شد نسيني القسي
نسيتي عتم الليل ع احفاف المسا"
و المشكلة هلأ انه رجعلي حلم مرة كتبته..انه اذا صار من نصيبي محمد بدي هاي الأغنيه نرقص عليها..ما قدرت أمسك حالي! رحت على الحمام و مسحت مكياجي بعد ما سحل..و رجعت بعد ما خلصت الاغنية ما بدي أشوفه و هو برقص معها ..
و خلصت الأغنيه لتبدا أغنية :
"أنسي الدني عيشي معي متل الورود اتدللي..بالكون غيرك ما الي بحبك أنا
انت حبيبي يلي معو بيوجعني يلي بيوجعو
ياطيور يا ناس سمعو بحبك انا
مادام الشمس بتشرق انتِ ومعي مابتفرق
كل العذاب بيمرق المهم نحنا سوا"
و الكل بدا يرقص معهم..كلهم فرحانين..و انا قاعدة لبعيد شوي مشان ما حدا يشوفني اذا غلبتني دموعي..
ما أحلاه ! كيف بدي أنسى حبي الصامت لإله من ٥ سنين ؟ أنا ما عمري حكتله لإني كنت خايفة من ردّه .. و هلأ الخوف شو نفعني ؟ غريب كيف بتختفي الاغاني و بيختفوا الناس و بس بشوفوا هو ! هو بس واقف و انا سرحانه في !..
اجا وقت يروحوا المعزومين عند محمد و أماني مشان يباركولهم..طبعاً انا ابداً مو ناوية أروح ! ما رح أقدر أقوله مبروك ! كيف بدي أبارك لواحد تمنيت أكون انا هديك اللي جنبه ؟ يا الله ماما عم بتأشرلي مشان أجي..رحت لعندها
"ماما ما بدي أروح خلص يوم الخميس بقوله مبروك"
"لأ يا إمي عيب ! معلش أكيد ما فيو خير إلك يالله والله اذا ما بتروحي ما منخلص من لسان مرت عمك ! يالله"
و مسكت إيدي و شدتني .. عم بمشي غصبن عني ! .. ما احلاه كيف بحكي معها و هو بضحك..يريتني أنا هي !
ماما سلمت على العروس و إجا دوري..دورت بوجهها على شي مميز..شي خلاه يشوفها قبل ما يشوفني ! وجهها حلو بس مافي شي مميز عني ! حكيت معها مشان أسمع صوتها..و كمان صوتها ما في شي مميز.. !
"مبروك"
انا حكيتها غصبن عني و في دمعة بعيني ما بدي تنزل ..
"الله يبارك فيكي حبيبتي عقبالك"
ما أبشع كلامك ! و لا لإني نفسي أكون مكانها شايفة كلامها بشع ؟
انتقلت إله...
كيف بدي أودع اللون عينيه ؟ اللي كل أشعاري بتحكي عنهم ؟
"مبروك محمد"
يا الله كيف حكيتها ما بعرف !
"مرح الله يبارك فيكي و عقبالك بس شدّي حيلك بالجامعه اوك ؟"
انت كمان بتقولي "عقبالك" ؟؟ شو أردّ أنا هلأ ؟ بصعوبة طلعوا أول كلمتين ! شو أحكي ؟ رح أضلني أتمنى لو أنا مكانها ...
"ان شاء الله .. الله كريم!"
و تمنيت أضلني واقفه بطلع بعينيه..بس هربت لما قربت منه و وشوشته ! ما بدي أشوفهم لا و هم بحكوا و لا هم بضحكوا !
بس خلص تحققت مخاوفي .. و أنا لازم أرضى بالواقع .. واقع انه لكل منّا نصيب .. و محمد مو من نصيبي ..... ودعت عينيه و روحنا على البيت و ما مسحلي دمعتي إلا مخدتي..و حرقت أشعاري و أقنعت عقلي ينسى..و أكيد... الله مخبيلي حدا رح ينسيني محمد... و كل شي فيّ حبّ محمد ...
______________
اتمنى تعطوني رايكم
