يلا ماطول
---
الجزء الثالث
بطلت أسمع ولا أشوف ولا أفكر ! صرت فجأة بكوكب تاني ..
"ولك مرح هي ١٠ مرة بناديكي يالله لمّي فناجين القهوة"
"وين راحو؟ روحوا ؟؟"
"حبيبتي مرح ما تقولي مرضانه تعي أشوف"
امي فكرتني مريضة بس أنا جد ما انتبهت لما روحوا .. انا بالعادة بودعهم على باب البيت مو مشانهم مشانو ! بس كأني كنت نايمة ..
دخلت غرفتي و أنا لسا كلامها بنعاد بعقلي ! معقول عم تمزح ؟؟ أو بتسمعني يمكن ؟؟
و النوم فارقني هاي الليلة .. و ما اجاني نوم بالمرة .. قضيت الليلة أفكر في و بحالي ! و اذا خطب وحدة غيري انا كيف بدو يكون حالي ؟ مو قادرة أتخيل حالتي قدامه بالبدلة السودة اللي طول عمري بتمنى يلبسها إلي لابسها لبنت محظوظة غيري ..
فتحت عيني و تمنيت لو إنو كل اللي صار مبارح حلم ! بس تأكدت انه حقيقة لما إجت إمي و قعدت جنبي
"صباح الخير..يا إمي اذا مكتوب إلك غصبن عن الكل بدو يصير الك و اذا مو من نصيبك أكيد يا إمي ما فيو خير إلك"
اقتنعت شوي ب كلامها..بس مو قادر عقلي يقبل فكرة انه رح يكون لغيري !
افطرت و صليت الظهر و قرأت سورة الكهف و دعائي ما بوقف.
اجا وقت سهرة الجمعة .. قعدنا على البلكونة أنا و ماما و بابا .. أنا وحيدة أهلي !
منحكي و بغني ل بابا و بصور السما اللي الليلة مليانة نجوم و نصف قمر.. بس قلبي مو مرتاح .. و عقلي رح يتبرى مني من كتر ما بفكر..لإني مبارح ما نمت كنت كتير نعسانة.. حكيت لأهلي تصبحوا على خير و نمت بدون هزّ مع انو تفكير عقلي كان بحاول يقاوم النوم بس النوم و النعس هالمرة أقوى منه
