هاهو الجزء الخامس والسادس ع الطريق
___________
الجزء الخامس
مرّ الأسبوع متل السنة ! عقلي بفكر ليل نهار .. بحلم في كل ليلة .. و بسمع أخبارهم كل يوم ! محمد و أماني طلعوا..محمد و أماني راحوا..محمد و أماني عملوا !!
بموت ألف موته قدامهم .. و هو بوشوشها .. و هو بضحكلها .. و هي قاعدة جنبه .. و قرروا الخميس الخطبة و كل يوم بتمنى اني أصحى تاني يوم و الاقي انه كل شي حلم ! أماني حلم و قراية الفاتحة حلم و الخطبة حلم...
اليوم الخميس .. اليوم الخطبة .. أنا كل ليلة ببكي لحتى أنام بس شكلي الليله رح أبكي للصبح !
يا الله كيف بدي أروح ؟؟ بدي ألبس فستان و أرقص بخطبة شخص تمنيت يكون إلي !
شو ألبس ؟ فستان أسود ؟ لانه بالنسبة لإلي عزا ! بس ما رح أخلص من لسان الناس ! انا شو عم بعمل ؟ بختار شو ألبس فستان لخطبة تمنيت تكون خطبتي ! يا الله !!!
كل شوي بترجعلي الصدمة و بصفن و بفكر و بروح لبعيد بعيد كتير ! انا كيف بدي أنسا ؟!!!
صارت الساعة ٧ و الفستان على التخت بستناني ! كل ما أنسى بذكرني انه الليله خطبة حبيبي ! لبست الفستان و حطيت مكياج خفيف و كل ما اتذكر ما بقدر امسك حالي و بسحل المكياج و بعيدو !
و استمر حالي حتى ناداني بابا :
"يالله يا مرح رح نتأخر !"
"يالله بابا هيني جاي ٥ دقايق"
٥ دقايق و رح أسمع زغاريد بتنتهي باساميهم ! و ناس رايحين و جايين يباركولهم ! و عيناي بدمعوا .. و بمسح دمعتي قبل ما حدا يشوفها.
مبسوط...فرحان كتير ! مبين من عينيه و ضحكته ! نيالها ماسك ايدها ! نيالها رح ترقص معا .. رح يغنيلها .. نيالها صار إلها ! و بدت الزغاريد و أنا بتصنع الفرح .. الكل فرحان .. الصغار و الكبار ! بضحك للكل مشان ما حدا يعرف ! بس دموعي مصرّة تفضحني ! بس أنا بمسحهم قبل ما حدا يشوفهم .. و وصلنا القاعة .. و كل شي حولي بزكرني اني بدي أرقص بخطبة حبيبي !
الزغاريد و الزمامير و الناس و إمه و إمي ! حتى عقلي مصرّ يزكرني ! بدت أغنية :
"يما يا يما شو هالليلة
يما دعاني الهوا جيت ألبي دعوتي يا ليلة قدر فيها اندق بابي
حيد يا هالقمر حبيبي قمر ليلتي
فرح يا قلبي بطلة حبابي
يما يمي يا يمي
شو هاليلية شوهاليلة
ليلة بتسوى الف ليلة..."
و دخلوا...و قلبي وقف !
